ÞINGVELLIR

Þingvellir voru samþykktir á heimsminjaskrá Menningarmálastofnunar Sameinuðu þjóðanna 2. júlí 2004 á fundi heimsminjanefndarinnar sem haldinn var í Suzhou í Kína. Með samþykktinni eru Þingvellir meðal tæplega 800 menningar- og náttúruminjastaða á heimsminjaskránni sem taldir eru hafa einstakt gildi fyrir alla heimsbyggðina. Þjóðgarðurinn á Þingvöllum var stofnaður með lögum árið 1930. Í lögunum segir að Þingvellir við Öxará skuli vera friðlýstur helgistaður allra Íslendinga, hið friðlýsta land skuli ævinlega vera eign íslensku þjóðarinnar undir vernd Alþingis og landið megi aldrei selja eða veðsetja.

Friðun Þingvalla átti sér aðdraganda. Í upphafi 20. aldar tóku að berast til Íslands fregnir um stofnun þjóðgarða í Bandaríkjunum. Þar voru augljósar þær hraðfara breytingar sem urðu á náttúrunni þegar Evrópubúar lögðu landið undir sig. Í þjóðgörðunum voru stór, óbyggð svæði tekin frá og friðuð og fólki hvorki leyft að nema þar land né nýta náttúruna á annan hátt en að ferðast um landið og njóta þess.

Hér á landi var bent á að mikilvægt væri að vernda einstaka náttúru- og sögustaði svo að komandi kynslóðir gætu notið þeirra óraskaðra. Fljótlega beindist umræðan að Þingvöllum sérstaklega og þeirri hugmynd að þar yrði stofnaður þjóðgarður. Á undanförnum áratugum hafa rannsóknir leitt í ljós að Þingvellir eru náttúruundur á heimsvísu þar sem jarðsagan og vistkerfi Þingvallavatns mynda einstaka heild. Það eru gríðarleg verðmæti og náttúruundur að geta fylgst með þróun og myndum nýrra tegunda á einum stað eins og í Þingvallavatni. Þingvallasvæðið er hluti flekaskila Atlantshafshryggjarins sem liggja um Ísland. Þar má sjá afleiðingar gliðnunar jarðskorpunnar í gjám og sprungum svæðisins.

Þetta gerir því Þingvelli að einstökum stað til að kafa á og því ber að kafa þarna með virðingu fyrir staðnum að leiðarljósi.

SILFRA - ÞINGVÖLLUM

Silfra á Þingvöllum er flottasti köfunarstaðurinn á Íslandi! Sumir segja, í heiminum! Þessi kristaltæra gjá er heillandi fyrir alla. Vatnið í gjánni er 2-4° allan ársins hring, skyggnið 150m en það takmarkast eingöngu af klettum í gjánni sjálfri. Silfra hefur ítrekað verið útlistuð af erlendum köfunartímaritum sem einn af þremur flottustu COLD WATER DIVING köfunarstöðum í heiminum. Silfra er það fræg að hún rataði á forsíðu TIMES magazine og er það að miklu leyti Tómasi Knútssyni köfunarkennari að þakka. Enda hefur hann að öðrum ólöstuðum verið sá sem kynnt hefur Silfru mest á erlendum vettvangi. Þarna er hægt að kafa í gegnum hella, niður á 40m+ dýpi. Bara allt sem hugsast getur. Við ætlum ekki einu sinni að reyna að lýsa staðnum, sjón er sögu ríkari. Ef þú vilt kynnast þessari perlu í íslenskri náttúru, þá er bara um að gera að skrá sig á námskeið sem allra fyrst. Köfun í Silfru er einstök upplifun sem enginn má missa af.

Einnig bjóðum við fyrirtækjum og hópum að kom og snorka í Silfru í hlýjum þurrbúningum og með grímu og snorkel til að upplifa hluta af fegurðinni.